是咁的，首先恭喜你順利清場，無驚無險又化解了一次政治危機！我本來係一位反對派，阿媽成日勸我去輪公屋，我都冇聽佢勸告。經佔領一役，覺得做反對派實在太冇前途，所以斗膽向您毛遂自薦，希望可以有機會同你挽鞋，執頭執尾也好。
這次違法的佔領運動，看似風波，其實都有莫大好處。首先，一次過就把反對派的底牌摸清，原來佢哋最叻都只係識坐坐街，係咁兒衝擊吓，即使俾佢哋衝擊成功，入埋政總，其實對您本尊亦冇絲毫傷害；其二，根據小弟觀察，即使放催淚彈當天或是清場當天，地鐵上嘅市民都係繼續低頭「滑手機」，FB上都係去咗邊度食飯﹑去景點影相，違法佔領嘅人的確係佔香港好少數；其三，這次的經驗，原來警察打人，小市民最多都係FB譴責吓，做鍵盤鬥士。因此，可以睇到今後您喺政策上打橫行，班刁民根本就冇你符，容我再分析吓如何幫您統戰香港，為您個人繼續搵錢上位。
根據馬斯洛的需求層次理論（Maslow's hierarchy of needs），最底部至頂部分別為生理需求﹑安全需求﹑社交需求﹑尊重需求﹑自我實現需求。顯然，香港大部分市民都仲停留喺生理需求﹑安全需求層次。而社交同尊重，只要整多啲景點，俾佢哋部幾皮嘢嘅相機影相﹑用部IPHONE 6打卡，或者鋪好啲條單車徑俾佢哋部幾皮嘢部單車疾馳，佢哋就相當滿足，大可不必理會。
實際上嘅統戰策略方面，首先，當然要先加警察人工，提高警察福利。此乃收編程序最重要嘅一環，成個香港對您本尊最有威脅，就只有香港警察。只要你提高警察人工，加快警察宿舍輪候嘅時間，起多幾個警察俱樂部，大把阿媽自自然然就會叫自己個仔去考警察。而且，政府﹑權貴同警察組成一個緊密嘅利益共同體，警察自自然然就會對您絕對忠誠，佢哋大部分都抱持打份工﹑搵食嘅心態而已，搵多幾份親政府報紙日日讚佢哋正義﹑維持法治，佢哋就會漂漂然，深信自己係正義化身，非常容易解決。但亦要密切留意有啲警察寫身在曹營心在漢，所以，必須加強警校思想控制，最好多啲吸納讀唔成書嘅人，嗰啲最好收編同洗腦。
其次，繼警察之外，最難搞就係班文人，啫係教授﹑老師等，個個時代都一定要面對嘅問題。您可以參考一下康熙嘅做法，嗰陣好多漢人條氣唔順，成日都想反清復明。康熙就搵佢哋去編撰康熙字典，重整古籍等，咁就耗費咗佢哋大半生，而且佢哋又有存在感，自覺為中華歷史出咗一分力。放落香港嘅情況，您大可加強中港融合嘅論述，搵晒班文人去編撰歷史。但有啲教授﹑老師仲會好有風骨，硬係要同政府反抗，例如發展本土論述﹑提倡自由民主概念等。對住呢班人，可以用發展一套教授升職嘅潛規則去收編佢哋，您是但整合中華學者協會，就係重演趙高嘅指鹿為馬嘅方式，邊個教授老師冇加入呢個協會，佢喺呢行註定冇運行﹑論文亦冇得刊登；相反，邊個老師﹑教授加入，就可以分辨到佢哋係「自己友」，俾啲咩「榮譽院長」﹑「香港優秀學者」獎佢哋，加以收編，香港本土論述自然會土崩瓦解。
最後，就係唔肯屈服嘅刁民，亦可以沿用上述方式，首先睇吓有冇得收編先，好似對民主黨咁做就啱，有錢齊齊搵，叫佢哋乖乖地做「體制內嘅反對派」。如果唔肯俾您收編，就嚇佢哋，好似您叫班警察用警棍扑吓人﹑見人就打﹑兇吓佢哋，好多香港人都係昏昏利徒，貪生怕死，佢哋就自然唔敢出聲，你嫌咁都唔夠嚇佢哋，仲可以縮減每年公屋上樓名額，佢哋自然爭崩頭。最後，收編又唔掂﹑嚇佢哋又唔掂，您大可以流放佢哋。嗱，咁啱我哋附近有個地方叫臺灣，班後生仔好鐘意臺灣嫁！您幫埋佢哋移民臺灣又點話，唔會晒好多錢。要亂要搞事，叫佢哋去臺灣搞，一石二鳥，臺灣個個掛住搞政治，有排烏煙瘴氣，您本尊自然就喺香港掠多幾年水先。
仲有，有啲嘢要平時keep住做嘅。例如，宜家個個講廣東話，語言會影響文化，必須要加強推廣普通話。做呢樣嘢，要做得好有技巧，如果唔係反彈就好大。首先，您可以叫TVB每日６點半播新聞前，整５分鐘用普通話講嘅中國新聞先，慢慢由５分鐘，１年後增加到１０分鐘，２年後１０分鐘增右到２０分鐘，最後半個鐘頭嘅新聞全部用普通話，香港人唔覺嫁。另外，如果要考公務員﹑警察，除咗基本學歷，就要加上普通話嘅能力檢定。咁您唔駛喺學校叫班老師教普通話咁犯眾憎嘛，佢哋就自自然然一窩蜂去讀普通話嫁啦。記住要溫水煮蛙。
如果仲有刁民之後幾年仲敢搞事，您大可以好似今次咁，全程唔好蒲頭，搵警寫同你擋住先。時間拖愈耐，班刁民自然會內亂，會策略分歧，有啲會灰心，甚至會周圍搞事嚟泄憤。咁就最好喇，您就叫東方﹑TVB等正義媒體，日日都話佢哋混亂，搞事等。自然就會失民心嫁喇。不過呢，正如我上面講，班有啲錢﹑有少少社會地位嘅文人就最麻煩最惡搞。但唔駛驚，您打個電話俾駐港解放軍，叫佢哋揸幾架戰機喺港島﹑九龍上空兜幾個圈，嚇吓佢哋，再透過東方﹑TVB等正義媒體影相放風出嚟，話中國要出解放軍啦！班文人﹑買咗樓又未供完嗰啲就好驚嫁喇，佢哋就會幫手勸退班刁民（切記唔好用坦克車喺市區兜，因為有機會俾刁民攔住，咁就麻煩，所以，一定要用戰機）。
香港呢，搵到錢嘅就嗱嗱臨移民外國；未搵夠嘅，就想快啲搵夠移民外國，佢哋唔會搞事；未開始搵錢嘅後生仔，就已經都想移民外國。呢一盤散沙，好容易搞。唔好因為呢次違法的佔領運動而慌張。放心，香港人功能性思維，覺得冇用嘅嘢就自然唔會做；就算做，都係三分鐘熱度，見冇乜效又會唔做。最緊要嘅係好多都只係昏昏利徒，用錢就可以收買。就算呢班人條氣唔順，佢哋都只會想快啲搵夠錢就移民，唔會同您對抗。您見呢２個幾月，都係得啲過氣歌手，何韻詩等出嚟幫手違法佔中。啲大粒嘅有影響力嘅，謝霆鋒﹑陳奕迅等聲都唔敢出，就知行白色恐怖嘅管治係幾有效。
最後，您或者會問，咁佢哋真係搞事咁您點算？放心，搞得成機會好低，最緊要係分化佢哋，逐一擊破，一個一個咁收編；唔得就嚇佢哋，打佢哋嘛，我上面都講咗。經過今次違法佔中就知佢哋冇料到啦。就算佢哋真係搞得起，都唔會喺你任內嫁喇，您大可放心，到時香港真係動亂，您都已經去咗北京做緊政協一係去咗英國退休喇！不過最緊要預埋我，我同您挽鞋﹑執頭執尾乜都得架！
睇完呢篇文，佢哋會好嬲，但又覺得無能為力，問自己可以做到啲咩去改變？多數咁結論都係冇您符，吹您唔脹。佢哋就會唔想理政治，覺得政治好煩。好似我屋企咁，宜家傾都唔傾得，驚嘈交嘛。宜家班刁民唔係頹晒，就想移民，威脅唔到您嫁啦。
您考慮吓我啦，我擦鞋好叻，溫水煮蛙一定做得靚靚仔仔，包您滿意。
沒有留言:
張貼留言