《雲南Day 1 到達麗江古城後記》

        昨晚十點先到麗江，搵到客棧已經十一點。麗江機場沒有車直達古城區，要先坐大巴(每人$20人仔)到離古城1公里遠既藍天賓館，再轉的士直達客棧，如機場直接打的大約$80-120人仔，抵不抵視乎同行人數。建議第一晚在網上訂平客棧粗住，安頓好再到麗江古城四處逛逛邊條街岩自己心水(幽靜或熱鬧)，因為選擇太多，而照片同實際感覺差別都大，揀客棧除了考慮外觀，地區位置相當緊要，因為古城晚上華燈四起甚為壯觀，地勢較高既客棧觀景房先至睇到。



        小農昨夜客棧標間$58人仔，性價比高，最重要既熱水同暖氈都有，風筒亦夠力，位置是古城熱鬧既七一街既一條幽靜小巷，稍作安頓同宵夜就馬上休息，準備第二朝一早坐車入瀘沽湖。



        一般麗江入瀘沽湖有三種方法，一是在古城管理亭坐雙程大巴(正常$160人仔)， 去程一般是八點在大水車集合，回程call司機留位(1星期內)，必須早一天預約; 二是先到麗江客運站坐大巴至最近瀘沽湖既鎮仔寧蒗，再轉麵包車入瀘沽湖(每人$30人仔) ; 三是慢慢沿路玩入寧蒗再入瀘沽湖，好處是不用花七八小時純坐車。



冬天往瀘沽湖的山路無太陽會結冰雪，所以必須趕在太陽時間駛過危險既高山路段，小農坐既係朝早05:40開出既車，由於夜晚到達麗江古城時亭管已關，最後拜託客棧既義工打電話代訂，果然出外靠朋友。



        冬天麗江到瀘沽湖車程要八九小時，早上至少七點先有早餐食，故小農前一晚買定土豆餅同乾糧，不少得要有足夠食水。車程中司機會停車小休，但所到商店食物必坐地起價，連去公廁都要收$1人仔，呢個視乎妳為真理可以計較到多少，嫌麻煩大可花錢買方便，但離譜既係收費廁所衛生環境相當惡劣，有時甚至無水洗手，較可取方法是cool 爆硬闖，對付無賴就要比佢更無賴。